LAUDIT MAVUGO:Awatuliza mashabiki simba

STRAIKA nyota wa Simba, Laudit Mavugo amesikia presha walizonazo mashabiki wa timu hiyo na kuamua kuwatuliza akiwaambia wasiwe na hofu kwani mambo mazuri zaidi yanakuja Msimbazi na msimu huu lazima wacheke.
Akizungumza na nijuzehabari.com, Mavugo alisema kuwa mashabiki wa timu hiyo walipoteza morali baada ya kufungwa kwenye mchezo wao dhidi ya Azam na kuondolewa kileleni mwa Ligi Kuu Bara, lakini sasa hawatakiwi kuwa na presha.
“Mashabiki walipoteza imani na matumaini juu ya timu baada ya kutolewa kileleni mwa msimamo wa ligi, ila naamini sasa wamefurahia kwa kushinda ugenini mjini Mtwara na wajiandae kuburudika zaidi wikiendi hii tukirejea tena kileleni.”
“Kazi yao kwa sasa ni kutupa nguvu na matumaini wachezaji ili tuweze kufanya yetu uwanjani kwani naamini Simba itamaliza ikiwa mabingwa kama tulivyodhamiria na hakuna haja ya wanaSimba kuwa na hofu yoyote,” alisema Mavugo ambaye hadi sasa ana jumla ya mabao matano.
Mavugo pia alisema mashabiki wanachotakiwa kufanya ni kuzidi kuipa nguvu timu yao ili iweze kupambana uwanjani na kupata matokeo yanayoweza kuiweka katika nafasi nzuri na si kufuatilia mambo ya timu nyingine na kuacha au kupoteza umakini katika timu yetu,” alisema Mavugo.
Mavugo katika mchezo wake wa mwisho dhidi ya Majimaji huko Songea alifunga bao lake la tano msimu huu na la kwanza tangu kuanza mzunguko wa pili wa Ligi Kuu Bara.
Washambuliaji Simba wamekuwa wakilaumiwa kwa kutoisaidia timu katika kufunga mabao.