TETESI BARANI ULAYA

 

MOURINHO KUMSHAWISHI WILLIAN KUTUA OLD TRAFFORD
*******************************
Mchezaji bora wa Chelsea kwa msimu 2015/16 Willian Borges amekuwa katika orodha ya wachezaji ambao klabu ya Manchester United ingependa kuwasajili katika majira ya joto.
Willian amekiri kuwa kocha Jose Mourinho alijaribu kumshawishi kujiunga na Mashetani hao kabla ya msimu huu kuanza ila akaamua kubaki Stamford Bridge.
Chelsea watakuwa tayari kumuachia Willian endapo kitita cha paundi milioni 40 kitatolewa na Man Utd. Willian huenda akatimka kutokana na kutokuwa na uhakika wa namba kwenye kikosi cha kwanza cha Chelsea kufuatia Pedro kuaminiwa zaidi na kocha Antonio Conte.

GRIEZMANN KUIKATAA  MAN U IKISHINDWA KUFUZU UEFA

Inasemekana mshambuliaji wa Atletico Madrid Antoine Griezmann anaweza kuikataa ofa ya Manchester United endapo watakosa nafasi ya kucheza klabu bingwa barani Ulaya msimu ujao.
United ambayo ipo nafasi ya sita katika msimamo wa ligi kuu nchini Uingereza itawabidi waongeze jitihada za kukwea nafasi za kuwapeleka klabu bingwa ili kumpata Mfaransa huyo.
Mbali na kigezo hicho cha kufuzu Ulaya United watatakiwa kulipa ada ya uhamisho paundi milioni 85 kupata saini ya Griezmann.

MAN UTD WAANZA MAZUNGUMZO NA BERNARDO

Klabu ya Manchester United imeanza mazungumzo ya awali na kiungo mshambuliaji wa AS Monaco Bernardo Silva kufuatia tetesi za muda mrefu.
Barcelona pia wameonyesha nia ya kumsajili Mreno huyo ila meneja wa Mashetani hao Jose Mourinho amemuagiza wakala Jorge Mendes kufanikisha dili hilo mapema zaidi kuimarisha safu ya ushambuliaji.
Monaco wameweka wazi kuwa Bernardo atauzwa endapo klabu yoyote itatoa kiasi cha euro milioni 70 kama ada ya uhamisho.

TORRES ATUA RASMI PORTO

Kiungo mshambuliaji Oliver Torres aliyekuwa kwa mkopo FC Porto akitokea Atletico Madrid amejiunga na timu hiyo kwa mkataba wa moja kwa moja.
Torres alikuwa miongoni mwa vijana wenye vipaji vya hali ya juu katika kikosi cha timu ya taifa ya chini ya miaka 20 cha Hispania kilichotwaa taji la Ulaya ambapo klabu mbalimbali barani humo zilionyesha nia ya kutaka kumsajili.
Torres anajiunga na Porto kwa ada ya uhamisho ya euro milioni 20 ambapo ameifungia mabao mawili katika mechi 18 za ligi kuu nchini Ureno msimu huu.

WILSHERE ATAKA NAFASI ZAIDI

Kiungo Jack Wilshere amesema mustakabali wake ndani ya klabu AFC Bournemouth aliyopo kwa mkopo akitokea Arsenal utafahamika baada ya kumalizika kwa msimu.
“Nafikiria miezi mitatu au minne mbeleni sijui kitatokea nini mwisho wa msimu ukifika tutakaa chini na kutafakari ila kuwa uwanjani mara kwa mara itakuwa sababu kuu ya kufanya maamuzi kwa sasa nafikiria jinsi ya kuisaidia Bournemouth hadi ligi iishe” alisema Wilshere.
Wilshere yupo klabuni hapo kwa mkopo wa msimu mmoja kufuatia kukosa namba kwenye kikosi cha Arsene Wenger na kuamua kuondoka ili kulinda kipaji chake.

‘RAMOS MPYA’ KUSUBIRI MAAMUZI YA MADRID

Kufuatia tetesi kuwa beki mkongwe Pepe huenda akatimkia nchini China huku kijana Jesus Vallejo maarufu kwa jina la ‘Ramos Mpya’ akifanya vizuri katika klabu ya Eintracht Frankfurt aliyopo kwa mkopo itabidi asubiri maamuzi ya miamba hiyo ya Hispania ili kujua hatma yake.
Vallejo akizungumza na Sport 1 alisema “Hamna aliyenipigia simu na kuniambia chochote ni tetesi tu, niliambiwa nije Franfurt nicheze soka vizuri wataniangalia ila hakuna makubaliano yoyote hadi mwezi Juni”.
Vallejo amekuwa mchezaji tegemeo klabuni hapo chini ya kocha Niko Kovac ambapo amecheza mechi zote na kuisaidia timu kutoka nafasi ya 16 katika msimamo hadi ya tatu katika ligi kuu nchini Ujerumani.